迪迪尼之旅

今年大年初一、二，我哋同爺爺、嫲嫲、大姑媽、二姑媽去咗迪迪尼到玩，仲係酒店到住咗一晚，爸爸媽媽好緊張，因為始終係我第一次係外面過夜，又驚我瞓唔到覺、又驚我唔夠飽(因為無粥食)、又驚我唔夠衫著......於是就好似走難咁帶咗一大袋行李，好彩最後都玩得好開心。不過去完迪迪尼爸爸媽媽話有三大發現：一就係以後都唔好揀冬天去樂園玩，仲要落埋雨，真係凍到乜都唔想玩。第二就係我同媽媽一樣唔係太喜愛迪迪尼公仔，我仲厲害，佢哋一行過嚟同我影相，我就梗係......大聲豪哭，所以各位Auntie Uncle 以後想送嘢俾我，最後都係送Helllo Kitty或者多啦A夢俾我就得。第三就係我好怕人多擠迫嘅地方，同埋好大嘅聲音，例如舞獅同睇煙花我都唔係好識欣賞。
不過全個旅程嘅高潮係回程搭地鐵時，我一上地鐵就......登登登登......賴屎，簡直係山洪暴發，雖然我有片片，但因為食咗中藥，所以d便便好希，有片都無用，連件賀年衫都係(原本仲諗住著住件賀年衫同公公婆婆拜年)，所以媽媽即刻用條大毛巾同我包住，仲即刻轉搭的士返婆婆到，仲要勞煩D姐姐同公公係天寒地凍底下企係的士站到等我，因為有大毛巾都無用，屎屎都過埋底，所以一落車佢哋就即刻再用另一條大毛巾包住我。我一入屋，姨姨原來已經幫我係房到開定暖氣，仲較定水俾我洗pat pat同沖涼，真係令我好感動。細叔公就同我改咗個花名叫"千金小姐"，雖然成個過程都好臭臭，但係我覺得好溫馨，因為全家人都咁錫我
(一)搭地鐵，好無聊

(二)jump jump jump

(三)同大姑媽睇水池

(四)睇煙花，不過我唔係咁鍾意


(五)係酒店食香蕉

(六)呢張係我將床仔，為咗配合迪迪尼，我都著咗件米妮睡衣，係咪好襯呢

(七)我最鍾意嘅小小世界


(八)嘩！巨人嚟喇！快d救我呀！

(九)爸爸同我捉泡泡

(十)因為無粥食，所以我又食香蕉

(十一)坐茶杯

(十二)好臭臭，但係都要飲奶奶