妹妹仍然好辛苦

冬瓜媽：昨日妹妹全日只係飲咗8安奶(仲要係開少咗奶粉)，今日就仲差，只飲得6安奶，而且精神都好差無晒笑容，成日都要人抱住，唔肯自己坐，睇見都心酸。你知我平時抱佢一陣就會好痛，但係今日我抱住佢抱咗差唔多成兩個鐘，痛到想死我都唔想其他人抱佢(包括婆婆)，因為我好想攬住佢，我好想佢知道雖然佢好唔舒服好辛苦，但係爸爸媽媽會陪住佢一齊，唔會離開佢半步。晚上我哋都試過再俾佢飲奶，但係個奶樽一放落口佢就已經喊到七彩，所以我哋就試用匙餵佢，睇見佢好想食，不停開口食但係每食一吓佢就不停係到喊，好似話俾我哋知佢好肚餓好想食嘢但就好痛食唔到，於是我真係控制唔到我d眼淚陪佢一齊喊，原來見到妹妹咁痛，我個心就更痛，原來真係無嘢及得上妹妹，真係好想你依家就好番唔再受病魔折磨，你要加油呀！天父一定會看顧你！